美國總統奧巴馬之前獲頒諾貝爾和平獎，呢幾日又要傾全球溫室氣體減排，一言一行都備受全球注視，但佢同父異母嘅細佬馬克就冇咁受歡迎嘞。尋日馬克為自己本新書喺香港舉行旋風式簽名會，穿梭跑馬地、中環及尖沙咀等多間書店，同市民會面，我哋去咗尖沙咀一間書店睇吓，發現睇嘅人多，但幫襯買書嘅只有幾個，難得馬克都非常有禮貌，同每一個買咗書嘅讀者傾談幾分鐘，好親民，其中一個熟口熟面嘅粉絲，仲係喺東莞開廠嘅全國政協委員梁偉浩。
馬克今次要宣傳嘅新書全名叫《NAIROBI TO Shenzhen》，除咗講述佢喺非洲、美國同埋深圳嘅所見所聞，書中都提及馬克細個畀爸爸打留下嘅童年陰影故事，內容早前曾經引起外界討論，有人甚至認為佢用哥哥過橋作宣傳。
不過馬克尋日並無接受傳媒訪問，又透過工作人員話希望低調啲，搞到大家埋唔到身咁滯。可能宣傳少，雖然圍觀者唔少，但即場幫襯買書嘅人就唔係咁多啦，搵佢簽名只有七、八人。做新書宣傳都要咁多顧忌，睇嚟做總統細佬都唔容易！