本文重點
由香港滙豐銀行贊助嘅「學生營商體驗計劃」展銷會尋日開鑼，一如既往，今年都係喺滙豐銀行中環總行地下大堂舉行，記得前年卓妮睇住鄭大班買到荷包硬化，要鄭太幫佢埋單，去年就買到要去櫃員機㩒錢，今年更加搞笑，佢竟然攞張「人仔」（人民幣）出嚟埋單，仲要人哋提醒佢攞住嗰張綠色人仔唔係港幣五十蚊，佢先發現自己攞錯錢，睇嚟明年二月開始調去北京做滙豐中國董事長及台灣區主席嘅鄭大班，未履新已袋定人民幣喎。
陳維安懷舊買豆袋
講番呢個「學生營商體驗計劃」展銷會，主持開幕嘅除咗鄭海泉之外，仲有即將接鄭大班做滙豐亞太區行政總裁嘅王冬勝及教育局副局長陳維安。今次都可以話係鄭大班最後一次參加呢個活動，記得上兩年鄭大班同太太差唔多可以幫襯晒全部攤位，今年唔知係因為人多得滯，還是識做嘅大班唔想搶王冬勝鏡，所以佢只係同王冬勝一樣行咗三個檔位就算，鄭大班最後買咗個月曆、一副啤牌同埋好似棋盤咁嘅紙牌玩具。
陳維安就花咗百幾二百蚊買咗唔少有童年回憶嘅懷舊玩具，好似六十八蚊嘅豆袋就係佢嘅心頭好，跟住佢又同其中一檔嘅學生玩拍公仔紙，佢話細個有玩過拋豆袋，但公仔紙佢就唔識拍，所以今次乘機玩吓，玩得不亦樂乎！
卓妮