早前我哋踢爆三人幫尋日中午雲集立法會大樓，同多名現任同前任議員食飯。雖然飯局講明係聯誼性質，但碰啱最近咁多有關五區總辭嘅風風雨雨、黑幕內幕，難免會令人質疑今次飯局又有乜嘢舉動。最巧合係我哋篇報道出街幾日後，「民主阿婆」突然通知立法會話唔嚟得，簡直係「此地無銀三百両」！

李漢奸同李鵬飛雖然冇放飛機，但兩人到場後，竟然完全冇握手打招呼問好，甚至連眼神接觸都唔覺有。到正式入席時，李鵬飛發現秘書處安排咗佢同李漢奸坐埋一枱，竟然顯得相當不情願，專登坐咗喺距離李漢奸最遠嘅一個位，不過最後喺立法會主席半拉半扯下，坐咗喺主席左邊，李漢奸就坐喺主席右邊，變咗左右門神，唔知主席係咪有意玩佢哋呢？

李漢奸被寸去補選

最搞笑嘅係同李漢奸及李鵬飛同枱嘅，清一色都係建制派現任同前任議員。有人仲喺席上當面寸爆李漢奸，話既然佢咁瞓身支持總辭，點解唔落水參加補選呢？飯局結束後，兩人亦有意無意前後腳離開。事後李漢奸被問到係咪真係會落水參選，佢就尷尷尬尬咁話「講笑嘅啫」，繼續玩縮骨。

與李漢奸同枱嘅前議員何世柱同我哋講，香港係自由社會，泛民搞總辭其實都唔係一件壞事，可以畀機會市民表達意見，但佢就估計五名辭職嘅泛民議員好難全部返議會，大潑李漢奸同李鵬飛冷水。另一前議員林貝聿嘉亦批評總辭係搵嘢嚟搞，浪費公帑，不過就唔知佢哋有冇喺飯局上當面向兩人表達意見喇。