經過一番明查暗訪、抽絲剝繭，原來事件背後係公民黨內嘅激進派為咗強推總辭，運用各種手法打壓黨內嘅反對總辭聲音，於是一步一步走上呢條集體跳樓嘅不歸之路！

公民黨十九名執委當中，最初對總辭嘅正反意見極其量只係各佔一半，但係以壹傳媒集團主席淫賤黎為首嘅「搞事四人幫」搞咗個「密室飯局」後冇耐，激進派就喺九月初嘅集思會上施以「突擊」，喺未經黨內諮詢同與其他泛民黨派協商下，通過仲激過五區總辭嘅「雙辭方案」。佢哋仲即晚緊急舉行記者會公開計劃，務求令反對者冇得翻案。

黨內嘅保守派最初仍未肯罷休，質疑激進派喺冇法定地位嘅集思會上通過一項咁重大嘅決議，明顯係違反黨章同程序公義，要求好似民主黨咁召開特別會員大會重新表決。不過最後激進派只肯喺本月初周年會員大會嘅「其他事項」議程上作出討論，同時四出收集授權票支持總辭。

其後民主黨華叔發火力抗「四人幫」施壓，表明唔會參與總辭，一度令部分原先支持總辭嘅公民黨黨員腳軟，不過激進派仍然拒絕「收油」，最終拉到八成票數力撐總辭，總之就要將整個執委會抬上虎背，邊個想褪軚邊個就係衰仔。

余若薇保黨魁位未能出戰

最搞笑嘅係，公民黨如果想喺總辭後嘅補選中贏番兩席，點計都應該派出吸票能力最高嘅黨魁余若薇出戰港島區，但原來該黨黨章講明黨魁必須係直選議員，余若薇同疑似候任黨魁梁家傑一旦辭職，按資歷就應將黨魁席位交畀反對總辭嘅湯家驊。激進派係無計可施之下，最後只好改派立會新丁陳淑莊出戰港島，令勝選機會大打折扣。

不過亦有人分析，公民黨咁做其實係想喺「四人幫」群星拱照助選下，谷紅外表中產、但其實立場偏左嘅陳淑莊做下一個「民主女神」，令黨內保守派以後都冇得翻身。事實上該黨嘅首批創黨成員之中，已有接近一半以各種理由先後退黨，明顯係對該黨愈走愈激、愈行愈左投以不信任票。