除咗化驗尿液，另一個方法就係頭髮驗毒，聽講準確程度高好多，而且避免當眾排長龍去廁所屙殊殊嘅尷尬。之不過咁，根據政府嘅官方講法，香港係冇頭髮驗毒儀器嘅，一定要向外國求助，成本仲相當昂貴，每驗一次盛惠一千大元。

咦咦咦，咪住先，好似有啲唔對路，香港咁多科研人才，諾貝爾獎得主高錕已經為港爭光啦，點解冇人識得頭髮驗毒嘅呢？莫非外國月亮真係特別圓？洋菩薩唸經真係好聽啲？

終於，有人企出嚟為本地科研人才爭一口氣。香港科技大學生物系教授詹華強表示，九個月前開始以現成嘅中藥分析儀器為基礎，發展出一套頭髮驗毒技術。科大已經同深圳嘅戒毒所以及香港青年協會合作，成功檢驗過一百個頭髮樣本，目前為止出錯率係零。

嘩！勁呀！功夫茶以科大為榮！呢嗱嗱嗱，香港最近連東亞運足球金牌都贏埋，你都咪話香港人唔叻仔，頭髮驗毒呢啲唔會難得過發明光纖嘅技術，三兩下手勢就可以創造傳奇。

詹教授仲話，新技術比外國嘅頭髮驗毒靈敏一千倍，可以追溯過去最少三個月嘅吸毒歷史，包括毒品種類同埋吸毒時間。外國要驗兩日先至有結果，香港只需十小時。成本呢？唔算貴，三百蚊。最重要嘅係，科大願意為大埔校園驗毒計劃提供技術支援。

既然本地都有高超嘅頭髮驗毒技術，咁係咪應該香港人用香港貨？照道理當然係啦，平靚正快而準吖嘛，不過政府嘅態度似乎相當崇洋，保安局局長政治助理盧奕基聽完科大嘅好消息之後，仍然重彈官方一貫老調，佢話喎，以局方理解，外國先至有頭髮驗毒儀器，真係畀佢吹到啤一聲！

唉，家陣乜嘢世紀呀？仲一味崇尚洋貨咁老土？中國製造已經風行全球，香港製造更加係正貨象徵，科大世界排名第三十五位，絕對唔會失禮街坊，官僚咁都唔識寶，難怪高錕弟子曾經好勞氣咁抱怨，香港政府忽視科技發展。

計功夫茶話齋，科大最好將頭髮驗毒技術發揚光大，然後捉晒成班高官去驗髮，睇下佢哋係咪中咗西洋巫毒！