本文重點
香港足球代表隊奪得東亞運足球比賽金牌，連日來贏盡港人掌聲，球隊尋日再獲香港賽馬會表揚。馬會趁尋晚跑夜馬，搞咗個「香港體壇傳奇祝捷會」，由馬會主席陳祖澤頒發獎座予香港隊，表揚球隊對香港足壇嘅貢獻，同場仲有上星期贏得國際騎師賽嘅兩位騎師分享喜悅，包括勝出一哩錦標賽嘅杜利萊及短途錦標賽嘅柏寶，一齊上台大合照。
望更多資源發展足運
香港代表隊領隊羅傑承及身兼足總主席梁孔德負責率領香港隊入場，兩人對球隊獲馬會表揚感到相當高興，羅傑承希望為香港足運繼續作出貢獻，佢同梁孔德均希望政府今後加大力度投放資源支持香港足運發展，最重要係提供更多足球場及訓練場地。
有份入場嘅入球功臣「陳七」陳肇麒就話，今次係佢咁大個人首次踏入馬場，之前亦從未試過投注賽馬，佢咁好仔，唔怪得練到咁好波啦！