咦，咪住咪住，交通工具加價就話言之成理啫，因乜事幹街市會加價？哦，係咁嘅，街市送貨要用貨車吖嘛，供應商當然又會向街市攤檔老闆加價，你作為街市顧客，唔好彩嘞，你會成為羊毛出在羊身上嘅受害者。

基於牽一髮而動全身嘅危機，所以咯喎，功夫茶有必要大聲疾呼：麻煩立法會尊貴議員，一嘢扑低大老山隧道公司再次加價嘅申請！

唉，呢間大隧公司真係冇乜人性，舊年十一月之嘛，適逢金融海嘯肆虐，成個地球債務重組，哈，佢哋居然大幅加價喎。事隔一年，金融海嘯餘波蕩漾，經濟仍然未見復甦，哈，佢哋夠膽死又話加價喎。今次提出嘅方案係各類車輛一律加一元，電單車加到十二元，私家車同的士十五元，輕型貨車二十二元，中型同重型貨車二十六元，平均加幅百分之五點九。

你話死得唔死得？今時今日打工仔，莫講話舊年冇機會加薪，唔減薪都偷笑咯，今年即使畀你行運行到腳趾尾，有機會加薪嘞，睇怕加幅都只不過係雞碎咁多多，肯定冇百分之五點九咁和味。之但係大隧公司硬係不顧社會責任，完全唔識得體恤民困，一於食咗你隻車，舊年加完今年又話要加。

大隧加價嘅理由講來講去都係利字當頭，蝕咗好多呀，賺得唔夠呀，諸如此類三幅被，不過今次有少少新意，提出咗一個怪論。佢哋發言人話喎，當年預期客量會不斷提高，但係獅子山隧道嘅收費冇如預期增加，令到大隧客量不達標，所以就有必要加價嘞。照咁講，一日最衰都係唔肯加價嘅獅隧，既然你唔劏客，咁冇辦法嘞，等我親自出手去劏啦！

立法會交通事務委員會尋日討論大隧加價問題，有議員質疑政府冇好好把關，任人加完又加。計功夫茶話齋，政府嘅把關工作由頭到尾都係戇居。

政府喺一九八八年批出三十年專營權，答應投資二十億嘅大隧公司可以得到百分之十三回報率。喂，媒人婆都冇話包生仔啦，邊有人做生意包賺錢㗎？由於政府拍心口保證有賺冇蝕，所以咯喎，大隧公司就大條道理咁話，係呀，我哋已經轉虧為盈喇，舊年六月底累積盈利已經超過一億，之不過咁，老子嫌賺得未夠多，而專營權仲有九年就結束，所以有必要密密手頻頻加價，否則賺唔盡百分之十三嘅利潤保證。

更加戇居嘅係，運輸及房屋局副局長邱誠武喺立法會話喎，如果行政會議否決加價申請，隧道公司可以根據《仲裁條例》訴諸仲裁，以前東區海底隧道都提出過仲裁，結果最終加幅比原先嘅申請更高。咁即係點？係咪靠嚇？定係長他人志氣滅自己威風？

講咗咁耐，係時候結案陳詞，麻煩立法會尊貴議員，一嘢扑低大隧加價申請之餘，唔該順手扑低戇居官員！