陳太當晚已經即時發表聲明狠批白鴿黨，尋日佢再借機再狂踩白鴿黨為佢自己遮醜，又向昨晚開會確認總辭計劃嘅公文袋施壓，以防佢哋臨場轉軚縮沙。

社民連中人唔想佢站台

陳太昨日同記者一方面話各泛民黨派應該立即停止互相攻擊，以免令內訌加劇影響選民喺將來五區補選嘅投票意欲，但另一方面佢又點名批評白鴿黨對自己嘅認受性同市民冇信心，質疑該黨嘅決定係「未戰先降」，再一次有口話人冇口話自己！

陳太表明會參加喺元旦日舉行嘅反政改方案遊行，並會考慮取消原定喺復活節假期起行嘅美加英三國「唱衰香港」之旅，留港瞓身為辭咗職嘅泛民議員助選。問佢會唔會幫成日公開鬧佢嘅社民連候選人站台拉票，佢就聲言會「對事不對人」喎。不過有社民連中人就表明冇咁嘅需要，費事佢哋啲支持者見到呢位「忽然民主」嘅「陳老太」，會忍唔住爆粗鬧佢同請佢食蕉！