本文重點
自從三年前賣咗亞洲商業銀行後，收咗幾十億Cash嘅陳有慶家族，喺香港無咩令人眼前一亮嘅投資，但最近陳家靜極思動，打算豪擲十幾億元搶地起醫院，即刻成為城中熱話。陳有慶愛子、亞洲保險總裁陳智思（Bernard）話，雖然佢哋喺泰國等地已經有醫院，但一直想喺香港起私家醫院，服務本港市民，因為佢係香港人嘛！
視乎地價合唔合理
尋晚陳家喺中環銀行家會所慶祝亞洲保險成立五十周年，亞洲保險董事長陳有慶一家大細全部出動，現場賓客逾三百人，逼到會所水洩不通，大家捉住Bernard問佢最近有乜搞作，佢證實有意競投黃竹坑塊地，目標係起一間針對本地人嘅私家醫院。
佢話香港好耐無開放投資起私家醫院，今次機會好難得，但最終都要睇地價合唔合理；如果塊地好似市價咁貴，倒不如起樓去賣好過。
不過Bernard話，佢哋同泰國嘅康民醫院合作得好愉快，唔需要再引入其他投資者；至於蘇州嘅地產項目就賣得好好，第一期已賣咗九成，賣晒嘅話可以有五億元人民幣收入，到時公司手頭更加鬆動啦！