為咗加強三十六名建制派議員嘅溝通合作，共抗泛民，建制派先後於今年七月、十月同十一月，喺中環上海總會搞咗三次飯局，討論議題愈講愈實質，由最近嘅譴責社民連爆粗掟蕉、以至當時仲未成形嘅五區總辭同政改方案都傾到。尋晚佢哋首次將飯局地點移師西貢清水灣道、全國政協常委兼民建聯監委會主席楊孫西嘅超級豪宅舉行，好似想刻意避開傳媒嘅耳目咁。有人更向與會者講明今次會「有正經嘢傾」，並有幾位特別嘉賓列席，三申五令叫大家準時現身同唔好將消息外洩，顯示飯局內容絕對係「近（勁）嘢」！

黎桂康坐住佢嘅平治座駕，喺大雨淋漓下離開楊家大宅。 （何偉鴻攝）	全國政協常委楊孫西尋晚喺佢嘅清水灣豪宅，設宴款待一眾建制派議員。 （徐家浩攝）	謝偉俊

彭清華指導性講話

飯局喺傍晚七點正開始，大部分建制派議員都有早冇遲，最終一共有二十六人到場，出席率比上次好好多。喺七點十五分，大宅主人楊孫西同詹培忠冒住外面嘅大雨寒風，走出門口迎賓。到底係乜嘢嘉賓咁把炮？之唔係中聯辦副主任黎桂康囉。其實中聯辦主任彭清華及兩位隨行嘅中聯辦部長早已抵埗。

(左)林健鋒　梁君彥

石禮謙

飯局喺接近十點半先至結束，事後絕大部分與會者都封口拒談飯局詳情，不過我哋八到，飯局一如所料有傾政改同總辭，雖然並無具體嘅建制派補選名單、競選部署同抗衡泛民嘅策略，但亦有好坦誠咁分析局勢同交流意見，只差在未有即場齊齊高舉五隻手指、誓言要全取五區補選踢走泛民。

成餐飯嘅重頭戲，就係彭清華喺食完甜品後發表嘅重點指導性講話。講話主要分為政改、普選同總辭三個部分，大意係無論泛民最終搞唔搞得成總辭，政改諮詢都會如期進行、如期表決；重申人大常委會已就普選問題講得清清楚楚，二○一七同二○二○年雙普選嘅嚴肅承諾，唔會因為總辭進行與否同有乜結果而出現改變；又強調泛民鍾意搞總辭就由得佢搞，不影響中央對港政策。呢番講話無疑係為一眾準備參加補選嘅建制派壯膽，鼓勵佢哋全力應戰！