阿一鮑魚嘅一哥楊貫一唔單止識飲識食，仲好識氹自己開心。佢年年生日都會買靚錶獎勵自己，卓妮記得前幾年佢買過隻LV腕錶，今年佢又另有新歡啦，就係愛彼錶（Audemars Piguet）今年嘅潮款Jules Audemars自動上鏈計時碼錶，要成廿八萬㗎！
前幾日卓妮喺香港餐飲聯業協會嘅活動見到一哥，佢隻靚錶十分搶眼，問係邊個送嘅，佢話係自己買嚟氹自己嘅啫。點解唔係仔女送㗎？一哥好體諒咁話，咁貴嘅嘢就費事後生破費啦，仔女送張生日卡畀佢，都一樣開心啫！
20年代復古設計
講番呢隻靚錶，係AP錶Classiques系列嘅經典之作，錶盤採用二十年代風靡一時嘅復古設計，展現優雅古典嘅運動風格。
