高級日本菜啱晒港人胃口。講到食最正嘅日本菜，立法會議員葉劉淑儀推介銅鑼灣恩平道四十二號日本料理Ten Yoshi「天扶良」嘅天婦羅，貪佢炸得香脆又唔膩。
葉太同囡囡榮欣都係日本菜迷，見到刺身就停唔到口，不過自從藍鰭吞拿魚因為太美味遭大量獵殺後，葉太就唔忍心再食吞拿魚囉。「天扶良」同「壽司廣」係姊妹店，賣的是高檔炸天婦羅，分別有鮮蝦、生蠔、拖羅、帶子及野菜天婦羅等，其中生蠔天婦羅夠鮮味，無沙泥味，入口即融化，一啲都唔韌。茄子天婦羅質地結實肉厚，一食就知並非本地茄子所能媲美。炸天婦羅講求炸漿、調味和火候，「天扶良」標榜脆漿「薄而鬆」，炸嘅火候仲啱啱好。
