今次香港主辦東亞運相當神奇，事前冷冷清清，期間蝦蝦碌碌，事後熱熱鬧鬧。家陣茶餘飯後都有人興高采烈咁討論：嘩！原來香港足球未死㗎！原來香港乒乓可以砌低國家隊㗎！原來香港壁球橫掃東亞㗎！原來香港武術威霸武林㗎！原來香港風帆順風順水贏到尖沙咀！原來……

一個又一個原來，一個接一個驚喜，令到東亞運先冷後熱，幾乎忘記晒主辦單位係幾咁亂七八糟，搞到觀眾去到現場居然有位冇飛賣。再加上幾位國寶級體育明星來港助興，欄王劉翔甚至表演當眾換衫，香港第一次主辦國際綜合賽事算係似模似樣，嚴格而言冇失禮街坊。民政事務局局長曾德成仲好風騷咁話，香港創出三個傳奇，第一傳奇係港足贏金牌，第二傳奇係獎牌破紀錄，第三傳奇係開幕有創意。

好嘞，咁多原來，咁多驚喜，咁多傳奇，於是就有人提議嘞，不如食住上申辦二○一九年亞運吖。

咦咦咦，喂喂喂，咪住咪住，申辦亞運？係咪大想頭咗少少？會唔會係勝利沖昏頭腦呀，老友？事關東亞運唔同亞運，亞運規模大咗不知幾多倍，香港真係有能力主辦？

功夫茶並唔係話一定要堅決反對申辦亞運，不過有三點值得斟酌。

第一點，港隊今次喺東亞運嘅表現無疑令人刮目相看，之不過咁喎，中日韓三大強隊基本上淨係派出二線選手參賽，如果精英盡出，港隊即使有主場之利都未必可以咁威風。好話唔好聽，萬一足球決賽嗰隊日本係大國腳而唔係青年軍，你估香港有冇機會贏呢？講得坦白少少，創造傳奇難以持續，如果香港作為亞運東道主而金牌食白果，你話幾咁醜死鬼呢！

第二點，東亞運規模不大，只有九支隊伍參賽，香港勉勉強強先至話唔使興建選手村，將運動員送去各區酒店安頓就得嘞。一旦主辦亞運，情況當堂唔同，都唔計你比賽場地夠唔夠，淨係興建選手村已經頭痛到暈。一來係撥地問題，二來係資金問題，三來係善後問題，假設你亞運結束之後將選手村當私人樓賣出去，到時一定會有人批評：哦，原來成個亞運根本唔係體育項目，而係一個官商勾結嘅地產項目！

第三點，呢個問題最現實，歷屆亞運蝕大本。明年廣州主辦亞運，預算投入超過二千億元人民幣，若然香港主辦二○一九年亞運，開支肯定倍增。你知啦，亞運唔係奧運，廣告效益相差好遠，亞運東道主十居其九蝕到阿媽都唔認得，香港係咪應該隨隨便便將千幾二千億公帑掟落鹹水海呢？

一句到尾，唔好貪勝不知輸。亞運唔同東亞運，申辦必須左度右度三思而行從長計議，千祈唔好一時衝動做傻仔！