香港律師會會長王桂壎一向百足咁多爪，識彈結他又識唱粵曲，尋日佢同傳媒講，嚟緊二月又準備跑馬拉松，仲為自己訂咗新目標，要喺兩個月減十五磅，務求操到最Fit去跑！
今年渣打馬拉松邀請唔同嘅專業團體領袖參加十公里馬拉松賽事，王桂壎都唔執輸跑埋一份，不過佢話自己好多年無跑過十公里賽，一定要減吓磅先去跑，否則就會拖累隊友喎，難怪尋日食飯時，遇到自己好鍾意嘅臘味飯都就住就住，係咁夾菜食唔夾臘味，但係最後都忍唔到口，話食埋最後嘅臘味先返去落實減磅行動。
其實王桂壎絕對唔使擔心，事關早前佢去北潭涌毅行者起步禮，中途遇到大塞車，佢為咗唔想遲到，當機立斷叫太太幫手揸車，自己落車行去起步禮現場，足足行咗一公里先到；點知到走嘅時候又遇到同樣情況，最後王桂壎又行返一公里先可以搭車走。由此可見，王桂壎絕對夠腳骨力跑十公里啦！