沙田馬場前日搞咗場「國泰航空香港國際賽事2009」，梁智鴻醫生及太太都獲邀入場，當日入場嘅紳士淑女都獲贈一頂帽，金刀梁同太太分別戴住白色同紅色靚帽，即刻醒神晒。聖誕佳節就到，問梁生梁太會唔會互送禮物，梁太話金刀梁一向唔興送禮物畀佢，聖誕卡就有，所以佢都費事煩送咩禮物畀老公。
梁太又講笑話，金刀梁嘅財物其實唔多，少到一個垃圾膠袋就裝得晒，數嚟數去都係得嗰四套西裝加四對皮鞋。梁太真係幽默，金刀梁乃堂堂嘅泌尿科專家，梗係唔會咁清貧啦！行政會議召集人梁振英（CY）住緊間獨立屋就喺山頂，聞說喺CY間屋度都望到金刀梁間獨立屋，住得山頂獨立屋，又點會窮呢？梁太太謙啫。
金刀梁上個月初出任香港大學校務委員會主席，大家講到獲頒諾貝爾物理學獎嘅中大校長高錕時，金刀梁大讚高錕為香港爭光，亦對高錕患上老人癡呆症深感可惜，話見到高錕喺頒獎禮上淨係識笑，無其他太多感受，覺得好遺憾。金刀梁成個專家口脗話，如果高錕嘅病早日被發現，起碼可以食藥控制住病情，唔使好似依家咁差。當然依家講呢啲都無用喇，我哋喺呢度送上美好嘅祝福！