立法會議員涂謹申喜逢第二春，同西九公關蘇麗芬拉埋天窗，尋晚就進行婚宴第三波，喺深灣遊艇會筵開二十席，同一眾政商界朋友分享新婚喜悅。一班高官名人畀面出席，其中包括保安局局長李少光。平時主攻保安事務嘅阿涂成日都要同光哥交手，所以光哥一早預備好大利是去賀佢，仲話唔可以唔到，因為阿涂其實係「影子保安局局長」，佢身為正牌貨絕對唔可以唔畀面咁話！
唔少司局長都有去飲，可謂星光熠熠，勞工及福利局局長張建宗仲上台獻唱《往事只能回味》同《你的眼神》，在場嘉賓一度起哄。早前捲入疑似求愛不遂亂炒女助理風波嘅甘乃威都拖老婆去撐場。商界方面，利豐集團主席馮國經到一到影張相，海洋公園主席盛智文就仲畀面，星期六觀完禮尋日再去飲，認真夠朋友。