本文重點
經濟不景氣，唔少大學籌款都唔容易，理大尋日出奇招「撲水」， 喺金鐘萬豪筵開三十幾圍舉行慈善晚宴，理大校長唐偉章粉墨登場，出動美國名牌電結他彈奏「飲歌」外，亦大玩名人效應，請嚟著名工業家蔣震千金蔣麗芸（Ann）做晚宴籌委會顧問，幫手揼富豪心口，成功為理大撲水逾二百五十萬元。
有「理大秋官」之稱嘅唐校長向有表演天分，繼早前喺歌星古巨基慈善演唱會上處女下海彈結他後，尋晚再度添食，同兩位校友夾Band，出動私伙紅色Taylor牌電子結他，彈奏一曲由佢親自作曲嘅作品，佢支電結他係美國名牌，要成逾萬元，係校長來港後專登買嚟娛人娛己，尋晚大派用場。
Ann蔣私己錢買鑽飾
有份自揼心口贊助晚宴嘅Ann蔣都出動唔少私伙鑽飾亮相，佢手上戴住三卡鑽戒，腕上一條紅寶石手鏈同鑽石頸鏈互相輝映，閃爆全場，左腕上仲有一隻伯爵鑽石錶，用嘅都係私己錢。晚宴上仲見到自嘲「神經富豪」嘅「牛仔褲大王」楊釗，原來佢同理大淵源好深，與前校長潘宗光同為虔誠佛教徒，啱傾到極，多年來低調地捐錢撐理大，數目幾多就唔講嘞，不過單睇理大將其中一個活動室名命為「旭日堂」，就知楊釗對理大貢獻非同小可。