鬍鬚曾對香港同全球經濟嘅睇法真係一時一樣，完全冇準，早前金融海嘯發生一周年，佢就誇口話經濟已經見到復甦嘅曙光。不過相隔短短一個月，佢睇到數據顯示香港經濟第三季反彈乏力後，佢又改口話經濟仲存在好多隱憂，出現Ｗ形雙底衰退都唔出奇，並警告香港可能已經出現資產泡沫，呼籲小投資者量力而為，態度仲飄忽過近日嘅港股走勢。

鬍鬚曾尋日喺「香港經濟峰會2010午餐會」上發表演說，突然又變番一名大好友，指去年五月份嘅經濟就好似一個患重病嘅人咁，雖然過咗危險期，但體質仍然非常虛弱，事隔半年有多，雖然仲未知幾時可以出院，但可以肯定嘅係病情已經有所好轉。佢又形容今年係動盪嘅一年，但好彩好快就可以過去，充滿希望嘅一年就要到來，預祝呢位病人明年可以好似佢一樣，早日康復出院齊齊迎接復甦。

擺李小龍上枱

鬍鬚曾仲特別提到，佢一向好推崇一代武術宗師李小龍嘅「Be Water」哲學，又話自己喺編制明年預算案時亦會緊守呢個「似水」原則。「Be Water」嘅原意係話做人要好似水咁剛柔並重、善於應變，但睇番鬍鬚曾過往咁多份預算案，就難免令人擔心佢講緊都係水分居多。

孖曾先後唱好全球及香港經濟，目的都係想降低市民對預算案嘅期望，即使政府到時唔派糖，亦希望社會嘅反彈力度唔會太強。不過市民眼睛係雪亮嘅，冇咁容易又畀孖曾嘅花言巧語呃倒，煲呔曾早前以差唔多嘅理由，拒絕喺十月施政報告加碼紓困，就立即令佢自己同整個政府嘅民望暴跌。若然鬍鬚曾有前車可鑑都堅持咁做，明年預算案嘅市民支持度同立法會贊成票數肯定再創歷史新低！