去西餐廳鋸牛扒、豬扒、雞扒就聽得多，鋸「花膠扒」大家又聽過未呢？行政會議成員、立法會議員劉江華平時唔聲唔聲，原來都係識飲識食嘅人，平時鍾意去灣仔馬來西亞大廈間「樂意牛扒屋」鋸新西蘭「花膠扒」（青衣魚肚），秘製花膠扒每一百克賣三百八十元，佢通常叫一件花膠扒配一份白飯，話白飯能吊出花膠鮮味，認真識享受！
大家可能會問：「花膠有乜咁特別呢？」樂意餐廳總廚楊大程（William）話，新西蘭花膠嘅膠質好重，肉身又夠厚，通常煮法係將七至八公斤花膠扒，加上雞肉、火腿、魚湯等食材一齊熬，熬完後連同香濃嘅花膠汁放入雪櫃保存，當有客人落單就再煮熱上碟，保證新鮮。William教路，由於花膠汁好有營養，有啲客人鍾意食完花膠後，用麵包索埋餘下嘅花膠汁精華，食得唔好嘥。
樂意牛扒屋喺七五年由楊家兄弟創立，至今已經有三十四年歷史，楊家一門四傑，大哥David、二哥Alexander、三哥William及四弟Michael夾手夾腳搞間餐廳，劉江華上星期去嗰日，除咗大哥David外，其餘三兄弟都喺齊度，咁難得，梗係要影番張相喇！
卓妮