15/12/2009

中環出更:信置黃永光向VERTU偷師?

手機科技日新月異,只要動吓腦筋,便可創造無限商機。信和置業執行董事黃永光近日亦對手機變身私人管家嘅概念好感興趣,上周六貢入貴氣逼人嘅VERTU手機專門店,中一部售價高達九萬五千幾元嘅手機,呢部手機係十足十嘅英國貨,硬件全部喺英國用人手製造,不過黃永光自嘲買唔起,話微服出巡純粹想向VERTU提供嘅「手機管家服務」偷師喎!

啱啱榮升爸爸嘅黃永光呢排忙於湊仔,但佢無忘記立法會議員涂謹申大婚之喜,上周六中午現身深灣遊艇會,同爸爸黃志祥前後腳到達,恭賀一對新人後,佢逗留無耐就離開。點知下午四點左右,卓妮又喺中環太子大廈VERTU手機專門店發現黃永光嘅身影,見佢攞住一部VERTU Signature銀色手機左按右按,顯得愛不釋手,佢一見卓妮都顯得愕然,仲主動澄清:「你唔好誤會,我係嚟學嘢,唔係買機!」

24小時私人管家服務

學乜呢?原來黃永光從友人口中得知VERTU手機提供24小時管家服務概念好新穎,只要一按手機上嘅客戶專鍵,手機就會直接連接到VERTU廿四小時服務台,無論你想查詢飛機航班抑或係交通、娛樂、飲食、酒店等資訊,都有專人為你解答,服務遍及世界各大城市,咁正嘅諗頭,連黃永光都為之心動,佢仲話:「如果我哋公司旗下嘅物業能夠引進呢種服務,你話幾好呢!」卓妮建議佢不如買番部返屋企慢慢研究啦,黃永光竟然謙稱買唔起,話睇吓已經心滿意足,真係識講笑!

年費八千不乏捧場客

VERTU手機係諾基亞旗下嘅奢華手機品牌,號稱全人工打造。VERTU提供嘅管家服務首年免費,第二年開始就要畀年費約八千元,但仍不乏捧場客,國際影星楊紫瓊、名導演張藝謀都係擁躉,黃永光咁欣賞佢哋嘅售後服務,簡直做咗佢哋嘅生招牌。

卓妮