立法會海濱規劃事宜小組委員會原定喺九月底至十月初，出訪美國嘅紐約、波士頓、巴爾的摩同加拿大嘅溫哥華，但後來先醒起同建國六十周年撞期，多名建制派議員為咗上京睇閱兵，就夾計將外訪計劃押後到明年二月十六至二十三日，心諗到時正值農曆新年假期，應該唔會再有議員因事甩底啩！

點知立法會秘書處近日向委員會匯報，話佢哋同美加駐港領事館聯絡過後，發現原來溫哥華咁啱會喺嗰段時間主辦冬季奧運會，要將碼頭暫時關閉改做海上酒店區。美國嗰三個北部沿海城市，每年喺嗰段時間都會刮起大風雪，大部分航班同海濱活動都會暫停，甚至連鐵路都會封閉，外訪團去到除咗食風同睇落雪之外，根本乜都做唔到。

考察無目的 猶乾隆下江南

不過今次鬧劇並冇打窒班議員用公費旅遊嘅興致，立法會民政事務委員會最近又密謀進行另一次外訪，最離譜係連外訪目的都未諗定，就叫秘書處做定資料搜集同前期規劃工作。委員會上個星期五討論外訪計劃時，旅遊界謝偉俊（阿Paul）就批評有關做法猶如「乾隆下江南」，勞師動眾兼浪費公帑，質疑班同事係咪為外訪而外訪。

阿Paul指出，如果議員純粹係想了解其他國家嘅政策措施同成效，透過上網同睇書已經有大把資料，毋須耗用公帑親身考察，佢本身都有參加早前立法會嘅東歐外訪團同英聯邦議會邀請香港議員參加嘅訪問團，覺得實際得益其實唔係咁多，建議議員諗清楚係咪物有所值同非去不可。

成日自掏腰包周遊列國嘅民主黨張文光，亦質疑立法會外訪團行程緊迫、趕頭趕命，係咪真係有助了解當地嘅文化同政策，並講明即使委員會通過外訪，佢亦唔會為咗啲免費機票同食宿而報名參加。不過委員會最後仍然決定向全體委員發出問卷，詢問佢哋想去邊度「外訪」同幾時出發，外訪目的就暫定係考察當地嘅文化藝術政策，真係好有意義喎！