本文重點
「福建幫」頭領、全國政協委員盧文端尋日六十一歲生日，賀壽節目由朝到晚豪到不得了，早上先喺沙田馬場豪擲四百萬元投得一匹美國良駒，夜晚再會合老婆仔女、新抱及女婿到灣仔著名法國餐廳Olala開生日派對，勁擦法國新鮮生蠔及白酒煮青口，仲開埋七支法國佳釀，包括市價約三萬八銀嘅1990 Chateau Petrus及約三萬元嘅1982年Chateau Lafite Rothschild，熱熱鬧鬧度過難忘嘅生日！
四百萬買「福建小子」
盧文端近期馬運亨通，愛駒「福建王子」上周三出賽又贏得第三，計埋馬主獎金及自己投注嘅一萬元，淨袋逾二十萬，難怪佢一於再添食，尋日喺香港國際馬匹拍賣會上重錘出擊，追價多次終以四百萬港元投得心頭好，改名為「福建小子」。雖然叫價較預算高出四十萬，但盧文端同練馬師都睇中匹馬潛質好，有信心將來可以贏多幾轉，咁就乜都抵番晒啦！
買咗件四百萬大玩具，盧文端歡天喜地，傍晚又到名人食肆Olala開生日派對，卓妮見到佢太太、公子盧金榮、千金盧金治、寶貝細女、剛當選廠商會副會長嘅女婿吳永嘉及兩個可愛孫女，捧住大包細包禮物到場，餐廳周老闆為「壽星公」預備神秘晚餐，頭盤係Olala招牌菜海鮮拼盤，由法國肥美生蠔、大西洋藍龍蝦及新鮮蟹隻拼成，加埋秘方炮製嘅白酒煮青口、地中海紅蝦意粉、有機無花果沙律及法式油浸鴨髀等，當然唔少得甜品蛋糕啦。
紅酒十年升價十倍
話明美酒佳餚，無美酒又點成事！盧文端除咗出動支1990 Chateau Petrus外，又攞埋支82年Lafite同家人品嘗，佢話支酒十年前購入時只係八千元，估唔到十年後升價十倍，好彩屋企仲收埋十支八支慢慢歎，喜慶場合先至開番支高興吓。卓妮講過，盧文端成為紅酒癡係拜旅發局主席田北俊所賜，當年獲田少送贈幾支不同年份嘅Lafite，點知一試上癮。
卓妮