本文重點
香港潮州人超過一百萬，除咗老牌嘅潮州商會及潮屬社團總會外，新界潮人總會尋日宣告成立並舉行就職典禮，由荃灣區議會主席周厚澄做首任主席，立法會議員林大輝及方平、鄭俊平等做副主席，場面星光熠熠，政府高官撐場不在講，長實主席李嘉誠表弟莊學山及唐學元、陳有慶等潮州社團元老仲做埋該會永遠名譽會長，身為「家己冷」嘅玩具大王蔡志明幾乎全家總動員支持，既然同新界人有關，又點少得鄉議局主席劉皇發！
林大輝同方平都異口同聲話，唔怕同其他潮州社團重疊，仲講笑話該會最主要都係等各方家己冷多個聯誼會。咁又係，潮州人出名團結，多個會等大家聚吓都唔錯。
至於做永遠名譽會長嘅蔡志明，除咗做咗媽咪嘅大女加敏無現身外，太太李惠莉、女兒加怡、囝囝加讚同姪兒加頌都到齊。蔡太雖然係山東人，但佢好有潮州女人嘅堅忍風範，對奶奶尤其至孝，所以蔡生好感激佢身邊呢兩個最重要嘅女人，無令佢做夾心餅，等佢可以專心打天下，蔡太為咗服侍奶奶，仲學埋潮州話同煮潮州菜，認真係好新抱。
加怡加讚回禮傷腦筋
仲有十幾日就到聖誕節，蔡家全家一齊去台灣旅行，加怡同加讚已收到媽咪嘅禮物，加怡收到一件Burberry trenchcoat，加讚就收到Leica M9相機；加怡件乾濕褸代表咗蔡太會為女兒擋風擋雨，加讚熱愛影相，一直好想買呢部相機，知子莫若母，所以加讚收到嗰陣真係好開心！不過佢兩姊弟都異口同聲話回禮好傷腦筋，事關知足嘅媽咪都無咩要求。
卓妮