係呀，多得高錕發明光纖，同你失散咗好多年嘅舊朋友終於有機會重逢。好多人透過交友網站成功尋人，冇見十幾二十年又可以再度聯絡，更加神奇嘅係，大家明明相距半個地球十萬八千里，居然可以即時對話。所以話啫，海外存知己，天涯若比鄰，已經由理想變成事實。

高錕出席瑞典斯德哥爾摩舉行嘅頒獎禮，獲頒實至名歸嘅諾貝爾物理學獎，全人類一邊歡呼喝采拍爛手掌，一邊少不免略帶戚戚然嘅傷感，個個心諗，如果呢個獎頒早少少就好咯，最好當然係高錕未患老人癡呆症之前啦，咁呢個傳奇故事就完美嘞。講起真係有啲眼濕濕，上次高錕接受訪問，已經唔係好記得自己係光纖之父……唉！

好彩，高錕仍然有能力親自去到頒獎禮現場，接受全球最尊崇嘅學術榮譽，同香港人一齊分享呢份驕傲。同樣嘞，又係多得光纖，人人都可以即時感受到華人之光嘅喜悅。

之不過咁喎，有一件事非常之咁奇怪，高錕同香港咁有淵源，又做過中文大學校長咁多年，連當日公布佢獲獎消息之後，都係中大幫佢發聲明嘅，點解特區政府好似冇乜表示咁嘅？點解唔覺有乜官方慶祝活動咁嘅？嗱，你唔好同功夫茶講，因為高錕攞嘅係外國護照，所以就唔當係自己人呀！

講開又講，事有湊巧，尋日喎，中大頒授榮譽法學博士學位畀政務司司長唐英年，台上台下亂七八糟，因為有好多人不滿佢名不副實，冇資格得到殊榮，所以走去踩場抗議。示威者又批評中大係政治獻媚，即係擦鞋。

好嘞，不妨比較一下，高錕得獎係實至名歸嘅，政府嘅態度居然係冷冷淡淡，反而唔見有乜成就嘅唐英年就可以高調獲頒榮譽學位，由特區第一把交椅曾蔭權親自主持典禮，大家會有乜嘢感覺吖？功夫茶醒你八個字：重視權貴，輕視學者。

講起又係略帶戚戚然嘅傷感，全世界睇怕只有中國領導人先至會咁睇唔起知識分子，讀書人竟然被貶為臭老九，你話唔心寒就假。可能特區政府秉承內地官僚作風啩，話之你讀書人有乜成就吖，一於闊佬懶理。至於權貴高官就唔同嘞，話之你係咪備受爭議吖，一於臉上貼金。

點都好啦，如果話高錕為香港人帶來驕傲，高官嘅漠視態度就係自暴其短。喂，一個諾貝爾獎得主你都唔識得如珠如寶珍而重之，簡直傳出江湖鬧笑話啦！