自稱「青樓名妓」嘅亞視前主席張永霖突然辭職，揭露亞視大股東查懋聲家族同第二大股東台商蔡衍明兩人就股權分配嘅恩恩怨怨。本身係亞視非執行董事嘅全國政協常委陳永棋之前都一直保持沉默，但尋日就表明立場撐查懋聲家族，大讚查生係謙謙君子，仲話查懋聲同蔡衍明應該和和氣氣，盡快平息糾紛，令亞視業務可以重回正軌。
張永霖辭職令到亞視管理層真空，我哋尋日撞到棋哥，佢話估唔到仲要真空幾耐，因為就算搵到繼任人選，都要兩個大股東「鍊完先算」喎！外間一直傳話查懋聲同蔡衍明就亞視股權分配有好大爭拗，仲成日有接近蔡衍明的消息人士放風，大數查懋聲不是。棋哥就話依家有好多報道不盡不實，又指認識查懋聲好耐，一齊做全國政協，一齊心繫香港，相信查懋聲到依家都未就事件作任何回應，只是「謙虛低調」。而喺亞視嘅爭議上，棋哥一定會企喺有理嘅一方。棋哥支持邊一方，都好明顯喇。