周日沙田賽馬第八場為國際一級賽事，獎金高達二千萬元，多匹過江龍來港較勁，盛況空前。鄉議局主席劉皇發大仔劉業強（Kenneth）有份嘅團體馬「好日子」都會出賽，但咁啱得咁蹺，匹馬編號第八，仲要排第八檔，三條「八」相當好意頭，可惜對手實在太強，連Kenneth都不敢寄予厚望，只好入馬房餵紅蘿蔔為愛駒打打氣。
Kenneth每逢假日好鍾意帶仔女入馬場觀賞賽事，原來Kenneth自己八、九歲都已經接觸賽馬，但唔係跟發叔，而係跟佢阿爺學嘢，Kenneth憶述，阿爺叫佢認住啲騎師：「呢個摩加利，呢個係告東尼呀！」Kenneth話，要從小認識賽馬，長大後才會對賽馬產生興趣。現時Kenneth個人擁有一匹「好知己」外，另外佢又參與三匹團體馬，包括「好日子」、「醉愛」以及「中環英雄」。
接觸馬匹咁多年，Kenneth揀馬都有一手，話馬匹要有良好體格外，仲要留意性格，有啲馬匹脾氣暴躁同緊張，未必適合香港環境，近年佢較喜歡新西蘭馬，馬匹較強壯，來港襟跑好多。