詐傻當聽錯

話說尋晚舉行東亞運足球項目準決賽，由香港決戰北韓，入場人數九千四，係各項各場賽事之冠。正當上半場四十四分鐘香港隊率先射入一球時，主席台忽然多咗個煲呔曾，佢入座後主動向看台觀眾揮手示好，結果觀眾完全冇面畀，即時報以噓聲。

不過，由於當時觀眾情緒高漲，煲呔曾唔知係真聽唔到定係扮傻，竟然將噓聲當歡呼聲，即時跟風同公眾一齊「歡呼」，認真爆。佢之後仲自得其樂玩相機，帶埋長鏡頭，除咗影賽事外，亦反過來影傳媒，不過不論係觀眾定傳媒之後都專心睇波，一於少理佢呢個「閒人」。完場後，陪煲呔曾睇波嘅港協暨奧委會會長霍震霆話，煲呔曾對於球迷以唔同嘅方式為港隊打氣，覺得好有趣。其實佢爆當有趣就真。