11/12/2009

播放本新聞相關短片

政情:陳鎮仁推莊救人自救

本文重點
立法會政府帳目委員會喺最近三日之內、舉行咗兩場合共接近八粒鐘嘅公開聆訊,公審被指管治混亂同浪費公帑嘅生產力促進局。唔少知情人士都戥生促局現任主席陳鎮仁唔抵,因為佢接任該職位只有五個多月,審計署揭發嘅不當行為,九成九都同佢無關,今次明顯係食咗上手嘅死貓。陳鎮仁亦喺大前日嘅聆訊上作出反擊,故意臨場親筆修改講稿,以示自己同舊有管理層劃清界線。

陳鎮仁明踩管理層之餘,仲暗幫佢嘅老友前生促局主席梁君彥(Andrew)開脫,救人自救。至於班帳委會委員係咪會咁輕易放生Andrew,就仲要睇過先知。

親筆加料改講稿

陳鎮仁本周二出席帳委會首次聆訊時,特別向委員派發一份佢臨場親筆修改過嘅講稿,同原稿最重要嘅分別,就係加咗「我承認生產力促進局在企業管治及項目管理上有粗疏、遺漏及失誤。但我要指出一些背景,我局在過去六年,換了三個總裁,創新科技署亦三年換(了)三個處長」呢幾句,以示千錯萬錯,都係舊有管理層同政府嘅錯,同我陳鎮仁無關。

再者依家科技咁發達,咁多人識得中文輸入法,陳鎮仁如果純粹係對下屬準備嘅講稿內容有微言,大可立即叫佢哋喺手提電腦上作出修改,再整整齊齊咁影印番畀啲委員睇。佢選擇親筆「加料」再「原汁原味」咁派畀班委員,明顯係想畀大家睇到,佢自己都唔認同管理層唔肯公開認衰嘅做法,希望帳委會最後寫報告時可以放佢一馬。

講真陳鎮仁喺今年七月先至接掌生促局,要佢骾晒上手剩低落嚟嘅蘇州屎,的確係唔多公道,問題係如果要卸鑊賴上手嘅,最直接嘅應該卸落做咗六年半生促局主席嘅梁君彥度,點解陳鎮仁冇咁做呢?原因好簡單,陳鎮仁之所以做到生促局主席同更重要嘅工業總會主席,或多或少都係得到梁君彥關照,如果咁快就「食碗面、反碗底」,肯定會畀人話衰仔,好難再喺工業界同政界行走。

有帳委會委員表示,佢哋一般而言只會傳召現任嘅官員同公營機構高層作供,但之前佢哋調查旅發局大花筒醜聞時,亦試過傳召前旅發局主席周梁淑怡同前總幹事臧明華,其實委員會過往經常點名或不點名批評一啲前任甚至已退休嘅高官,總之一切都要等大家開過會先可以決定。