行政會議召集人梁振英（CY）自己種瓜種菜，不過問起佢最愛嘅食肆，佢最讚不絕口嘅係灣仔駱克道嘅美利堅菜館，不過好可惜，佢最回味無窮嘅糖醋黃魚，已經絕種。
CY係山東人，自細食山東菜大，梗係對魯菜情有獨鍾。美利堅最拿手嘅係京菜同魯菜，CY話京菜源於魯菜，兩種菜系一家親，所以啱晒佢食。佢最鍾意美利堅嘅糖醋黃魚、沙鍋津白同埋手撕雞。講到糖醋黃魚，CY諗起細個嗰陣時又平又肥美嘅黃花魚，條條都有成個大人嘅前臂咁長，都係賣一蚊咋，不過依家已經冇咁大條黃花魚喇。
美利堅嘅張經理同CY有同樣嘅感慨，佢話大條嘅黃花魚已經絕種，依家美利堅賣嘅糖醋魚，主要係桂花魚，坊間賣嘅黃花魚，好多都係以白花魚染色充當。不過佢話呢度都有其他名菜好受歡迎，例如北京填鴨同叫化雞。
張經理話美利堅喺灣仔已有五十幾年歷史，之前喺灣仔道有賣西餐，開咗駱克道嘅新美利堅，至專心做京菜同魯菜。京菜味道較濃，對比廣東菜有唔同嘅口味。
卓妮