本文重點
當一個人買嘢嘅時候唔使睇價錢，唔使睇牌子，唔使追潮流，佢追求嘅，又係另一種品味。令賭王何鴻燊同二太藍瓊纓嘅千金何超蕸廿幾年冇變心嘅牌子，唔能夠着上身，而係丹麥高級音響品牌BANG & OLUFSEN（B&O）。
超蕸身影近年活躍於青年團體，今年「升呢」做香港青聯名譽副主席。日前國務委員劉延東訪港喺會展會見青年團體代表，超蕸亦盛裝打扮，着上Donna Karen金黃色外套，手挽Hermes Plume系列鮮紅色鴕鳥皮手袋，其實一身都盡是名牌。
不過講到衣着打扮，超蕸自嘲並非「潮人」，笑言買嘢講實際，唔追名牌：「我行街鍾意買乜就買乜㗎喇！」超蕸身家豐厚，隨便一個Hermes手袋，已值十萬零八千幾蚊。
喜愛B&O音響情不變
講到追求牌子，超蕸就自爆係B&O擁躉，愛足廿幾年未變心，貪佢音質超凡，全間屋嘅所有音響設備都係呢個牌子。唔少音響發燒友鍾情「砌機」，超蕸就謙稱唔識砌，行入舖頭睇啱就扑錘，成套組合搬番屋企。
B&O音響喺香港亦設有多間專門店，產品售價不菲，一部六十五吋平面電視售價高達廿七萬元，閒閒哋一套光碟唱機亦賣五萬幾，難怪歐洲皇室成員都捧佢場。
聽歌以外，超蕸亦積極推動青年工作，佢今年仲自掏腰包捐咗一百萬銀畀青聯，低調地做實事。
卓妮