到底乜嘢聖戰呢？係咁嘅，誨淫誨盜嘅壹淫媒喺台灣撞大板，繼之前販賣色情暴力嘅「動新聞」受盡千夫所指，台北市長郝龍斌順應民意連環重罰之後，壹淫媒想搞嘅電視台又申請失敗，負責審批嘅「國家通訊傳播委員會」（ＮＣＣ）正式否決壹電視設立新聞台同埋資訊綜合台。日前，ＮＣＣ亦已對壹淫媒申辦嘅另外三條電視頻道娛樂台、體育台及電影台「暫緩審議」。

ＮＣＣ否決嘅理由堂而皇之，首先，壹電視新聞報道以動畫表現類戲劇嘅手法，不符合新聞報道應該真實呈現嘅要求；其次，台灣嘅通訊傳播基本法第五條訂明，通訊傳播應維護人性尊嚴、尊重弱勢權益、促進多元文化均衡發展，壹電視明顯違規，尤其係關於維護人性尊嚴。

ＮＣＣ發言人陳正倉又提到，委員會認為新聞報道應該係普遍級，唔應該分為限制級或者輔導級，所以對壹電視嘅申請「不予通過」。言下之意就係，壹電視嘅播放內容將會係兒童不宜，所以有必要防患未然。

嗱嗱嗱，呢啲先至叫做正氣凜然吖嘛！淫賤黎旗下壹淫媒擺到明就係掛羊頭賣狗肉，你畀佢經營電視台？肯定教壞細路，絕對誤盡蒼生！

講到呢度，功夫茶忍唔住要吶喊助威：台灣人民好嘢！台灣政府好嘢！恭喜你哋反淫媒勝利！

唉，之不過咁，台灣就話正氣凜然啫，反觀香港以及內地咯喎，簡直烏煙瘴氣。香港人唔係唔想反淫媒o架，好似執咗笠嘅《壹本便利》咁吖，刊登十四歲細路女李蘊濕身性感照，激到民間團體七竅生煙，尤其婦女組織更加嬲到震，齊齊操去示威抗議，結果壹淫媒成為香港第一間被控觸犯《防止兒童色情物品條例》嘅傳媒機構。問題係，民意反淫媒係完全冇用嘅，因為官意係義無反顧包庇縱容。觸犯《防止兒童色情物品條例》又如何？法官先判表面證供成立，後來竟然莫名其妙判無罪。

一次係咁，次次係咁，壹淫媒違反《淫褻及不雅物品管制條例》過百次o架喇，餐餐都係輕判了事，罰款永遠一萬幾千雞碎咁多。冇辦法，淫賤黎有港英餘孽撐腰，宣淫販賤好似攞正牌咁，害到原本潔身自愛嘅香港人成為「性戰」嘅炮灰。係呀，台灣打聖戰，香港打性戰，任得淫賤黎鼓吹孌童又得，偷拍女藝人後台換衫又得，利用藝人床照大發鹹濕財更加得。

至於內地咯喎，包庇縱容嘅程度不遑多讓，壹淫媒報刊想喺深圳通街有得賣咩？冇問題，官老爺隻眼開隻眼閉。壹淫媒想喺香港上市咩？冇問題，中資機構甚至出錢支持，又落廣告畀錢佢賺。

即係咁，香港民意唔係未試過怒吼，可惜官意由始至終狼狽為奸，縱容淫媒誤盡蒼生！

除咗淫賤，就係老作，最新一期台灣《壹週刊》無中生有作咗一個古仔，話總統馬英九將民望急跌歸咎總統府負責聽電話嘅工作人員，所以要進行座談。查實，座談係有嘅，不過原因係馬英九想感謝工作人員。總統府發言人王郁琦嚴肅澄清，批評《壹週刊》未經求證嘅寫法係「非常懶惰」。你話吖，又淫又懶，唔反點得！