專業會議立法會議員石禮謙「大舊石」上月三十日突然心痛，即晚入醫院做通波仔手術，佢呢次手術十分順利，手術翌日已經無大礙可以出院。一睇尋日大舊石健步如飛返立法會開會就知佢無事啦！大舊石仲笑笑口話，依家乜都唔食得，淨係可以食菜，相信戒口對佢嚟講先係最辛苦嘅事啦！
通波仔手術簡單嚟講係將個波仔放入心血管，然後再放入支架將血管撐住。計埋今次手術，大舊石喺九年內已經做咗六次手術，佢仲笑笑口話依家身體裏面總共有十四條支架，可想而知大舊石嘅戰績有幾「彪炳」！
大舊石愛美食，所以一講到戒口佢就苦笑話咩都唔食得，最多只係食菜，甚至連酒都要少飲。不過話時話，身形有番咁上下嘅大舊石做完手術一個禮拜多啲，就返立法會開會，而且都唔覺得佢有明顯瘦到，比起通完波仔要留醫成個星期嘅鬍鬚曾似乎強壯得多。但點講都好，大舊石呢次真係要乖乖地戒口啦！
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
