吳靄儀一向以法律界代表自居，議事堂上自詡係法律權威，佢喺譴責「潮州甘」一事上反口覆舌，最初係佢力排眾議，唔畀議員個人利益監察委員會（議監會）接手跟進，堅持要以被視為「極刑」嘅譴責議案形式處理，點知依家最大聲反對譴責行動嘅竟然又係佢，真係四川變臉都無佢咁強橫。尋日吳靄儀再次貢出嚟試圖為「潮州甘」脫罪，最終成為眾矢之的，被人轟到仲傷過罪魁「潮州甘」。

「法律超人」謝偉俊（Paul）批評吳靄儀，一時話一定要查，一時又話唔使查，分明係佢做人矇查查；阿Paul叫佢有錯咪認囉，千祈咪一錯再錯！民建聯劉江華直斥吳靄儀打倒昨日的我；議監會主席梁劉柔芬揶揄呢位公文袋大狀，話吳靄儀身為議事規則委員會主席，又係法律界代表，應該好熟例，所以咪信佢囉，點知最後變咗另一回事。言下之意，即係話千錯萬錯，最錯係信錯吳靄儀。

金勞詹乘勢踩大狀黨

一向言論出位嘅「金勞詹」詹培忠直斥吳靄儀當成個立法會佢玩晒，又乘機打埋大狀黨，佢重提當年自己因偽造文件罪成被褫奪議員資格一事，話當年佢初審罪成，都未等二審同終審，立法會就取消佢嘅議員資格，根本唔尊重程序；佢又借題發揮，鬧部分議員攞住民主個牌，達到個人私欲，「尤其係代表法律界嘅」。

吳靄儀就反擊，指金勞詹言論有冒犯性，立法會主席休會十分鐘，復會後要求金勞詹收回言論，金勞詹唔肯，反指係有人對號入座啫。吳靄儀死撐，話當初堅持用譴責議案，只係唔想議監會擴權喎，呢啲咪叫死雞撐飯蓋囉，食咗咁多波餅，瞓低抖吓好過啦！