本文重點
旅遊發展局主席田北俊出名識飲識食，但居於山頂關係，上山下山搵食車程需時，所以田少放假中午嗰餐多數會幫襯屋企附近間太平山餐廳。雖然餐廳菜式多元化，但田少唔係味味都睇得上眼，他只對泰式炒金邊粉情有獨鍾，其次係海南雞飯，皆因餐廳有個泰國廚師坐鎮，一切香料及食材都由泰國入口，難怪連嘴饞嘅田少都吸引到啦！
炒金邊粉最滋味
田少話，太平山餐廳地點夠就腳，食物又多選擇，由東南亞以至歐美菜式共冶一爐，坐在露天茶座，可以欣賞港島南區美麗景色，但最重要係活動空間十足，啲孫仔就最鍾意嘞。啱啱在上周日，田少兩公婆都有去食晏，又係叫泰式炒金邊粉，一碟兩份食，不知幾滋味。餐廳經理Rick Wan透露，田少已幫襯咗好耐，佢大讚田少為人爽快，好易話為，完全無架子！
太平山餐廳前身為山頂餐廳，建於一八八八年，曾經作為黃包車（人力車）嘅遮篷，二次大戰後改為山頂餐廳，及至○一年再進行全面裝修，但至今仍保留住建築物嘅原有架構及傳統風貌。