港鐵將軍澳線同荃灣線早排發生連串故障，其中荃灣線列車供電組件出事之後，職員冇即時啟動後備供電系統，結果要用多一倍時間修復，列車服務受阻成個鐘。輿論狂炳港府姑息港鐵，靠害市民。港鐵前日回應立法會議員質詢，話當日職員係因為「無法應付龐大壓力」至出錯。出席同一場合嘅運輸及房屋局高官就話，有要求港鐵跟足指引營運，但死口唔認港鐵服務質素下降。港府同港鐵擺明扯貓尾啫，雙方都話自己冇責任，你冇錯，佢又冇錯，咁唔通係乘客嘅錯？錯在佢哋選擇搭港鐵？

講真，列車服務受阻至多遲啲到啫，最得人驚嘅係，原來港鐵月台周圍都係安全陷阱。呢嗱，上個月底有位七十幾歲嘅英國婆婆，喺港鐵金鐘站一腳踩落月台同列車之間嘅空隙，成個人卡住唔郁得，消防員用咗廿分鐘至將婆婆救出。

之前亦有位七十九歲本地婆婆喺旺角東站上車，右腳踩入空隙，失去平衡仆低，啪！連腳都斷埋。前幾日喺油麻地站，又有乘客右腳卡喺月台同列車之間罅隙受傷。

唔講唔知，原來由○七年到今年十月底，港鐵發生過五百幾宗「差錯腳」意外，淨係今年頭十個月，就有一百五十五宗，港鐵仲唔認衰，話問題唔算嚴重。本報記者去港鐵大學站實地度過，發現月台同列車嘅空隙超過十四吋，咁嘅距離，細路仔差錯腳隨時跌落路軌，咁都話唔嚴重！

仲有，車廂同月台高低差成四吋，老弱婦孺或者心急上落車嘅乘客隨時會中招。如果咁都話唔嚴重，係咪多幾個乘客斷手斷腳，甚至搞出人命至算嚴重？港鐵至肯做嘢？

多年嚟，市民一直要求港鐵盡快喺月台加裝自動伸縮踏板，避免乘客無辜傷亡，但至今仍未能落實。港鐵前日仲話，伸縮踏板會影響行車時間，需繼續研究。

簡直混帳！港鐵安全陷阱多多，嚴重威脅乘客生命安全，仲要研究到幾時吖？如果傷亡事故涉及外地旅客，令香港聲譽受損，呢隻鑊港鐵又孭唔孭得起？

最令人扯火嘅係，港府身為港鐵大股東，居然冇監冇管，事故一單接一單，高官淨係「要求港鐵跟足指引營運」，好似乘客安危、香港聲譽同佢哋完全無關咁。當初兩鐵合併時，當局信誓旦旦會改善服務質素，提升安全水準，依家又點解釋吖！