平時港府有難，建制派會出手解圍，但今次東亞運門堪羅雀，港府束手無策，佢哋似乎愛莫能助。尋日開幕禮上，有約廿名建制派立法會議員捧場，高官之中，除咗四、五個要落區做騷外，其他全部奉命現身撐場，個個做晒啦啦隊，攞住打氣棒棒，又搖又叫，不過，出席開幕禮，唔等如捧東亞運場，我哋問過政界人士，唔少都話唔會買飛入場。

捱騾仔唔想入場

醫學界議員梁家騮慨嘆，東亞運同港人嘅生活落差極大，港府雄心勃勃，但市民個個長工時捱騾仔，放工返到屋企都夜晚八、九點，仲邊有閒情逸致睇東亞運吖，尤其做咗人老公嘅，有時間唔陪老婆而去睇東亞運？唔怕被人扭甩耳仔咩！至於佢係咪怕被人扭耳仔而唔捧東亞運場，佢話，呢個問題同審議重大法案一樣，佢唔會輕易表態嘅，不過心水清者應該知道，梁家騮到依家仲係未結婚嘅。

另一位建制派議員克勤仔表明，明知無時間睇東亞運，費事早早預訂晒啲飛，生人霸死地喎。克勤仔此言差矣，依家東亞運嘅問題，係太多空位剩；如果真係有心支持，隨時即場都買到飛㗎。

孫公寧願睇英超

東亞運撩唔起議員興趣，官員同有份協助東亞運嘅團體阿頭一樣反應冷淡。「孫公」孫明揚太太鍾小芬話，孫公一向鍾意睇足球賽事，不過，公務繁忙，好難抽到時間捧東亞運場，寧願夜晚留喺屋企睇英超好過，反而，孫公會為東亞運籃球賽頒獎，到時話唔定順便做埋觀眾就真。而馬會主席陳祖澤亦話，唔會入場睇東亞運，但會入場頒獎，頒咩獎就暫時未知道。

睇見政界人士嘅反應，真係令人為東亞運憂心，睇嚟港府同東亞運公司真係要好好認真檢討一下推廣策略至得嘞！