與本老相交逾十年，楊釗每年都會前往祝壽；楊釗生日，本老就會送贈親筆字畫當做禮物。究竟楊釗如何與佛結緣呢？原來，一切緣自名成利就！白手興家嘅楊釗同卓妮娓娓道來，佢憶述，廿幾歲仔已經衣食無憂，七五年時身家有五至六百萬元，足以買港島半山或跑馬地廿五至三十個單位，有樓、有車、有遊艇，雖然名成利就，但竟然唔係太開心。

楊釗估計北京道一號現市值最少有四十億，印證佢當年無買貴貨。 （資料圖片）

楊釗信佛後淡薄名利，不但無穿金戴銀，就連唯一嘅名牌手錶都無戴，長放褲袋。

看透因果 處事中庸

楊釗自始埋頭探討名利背後嘅人生問題，四處問人：「人生應該追求乜嘢？」有人叫佢「取諸社會，用諸社會」，亦有人叫佢在宗教搵答案，佢試過去教堂祈禱及研究聖經，個個星期去，去足一年，雖然有得着，但找唔到答案。直至八一年有次回鄉探父親，研究佛教嘅堂叔送佢兩本佛書，細看之下，竟然一一解開佢多年來追尋嘅人生難題，看透「因果報應」，於是開始信佛，待人處事行中庸之道。

信佛後嘅楊釗，每天打坐一小時十五分鐘，又每月出版《旭日之聲》，親自執筆定期檢討同反思，保持公司發展優勢。楊釗話，八一年佢嘅身家已增至四億元，發覺地產投資利潤更好，於是將其中二億元投資地產，以八百元呎價買入二十四萬呎尖沙咀星光行物業，至九四年以十四億元高價出售，大賺十二億元；其後又以二千萬買下荔枝角道鍾意商業中心，又賺取逾五億元利潤，前後共獲利約十七億元。

楊釗在九龍灣公司大本營頂層設置佛堂，中間最大嗰座佛像，係根據大嶼山天壇大佛嘅式樣去做。	深圳弘法寺開山方丈本煥長老上月一百零三歲壽誕，楊釗（右一）同太太專程到深圳向師傅祝壽。 （潘筱璇攝）	旭日集團位於九龍灣KOWOON ONE嘅商廈大堂，設計好有禪味，左邊三塊石代表一家三口家庭和諧嘅意思。

定期反思 投資有道

不過，在九八年四月樓市仲係處於高峰期之際，楊釗以十二億四千萬元投得北京道一號地皮，當時被人笑佢買貴嘢，但楊釗嗤之以鼻話：「買貴咪買貴囉，關啲人乜事呢？最多話我戇居兼老襯啫，我又唔係向銀行借錢買地，就算蝕晒都唔影響我生活，有時唔使賺得太盡嘅！」咁就係楊釗信奉嘅中庸之道。其實楊釗無買錯嘢，佢話北京道一號現時最少值四十億元，名牌零售暢旺更帶動今年商舖租金收入上升添。

至於外間盛傳楊釗喺去年金融海嘯蝕入肉，佢就同卓妮講，喺去年八月八日北京奧運開幕當日，已下令投資部將手頭過十億藍籌股全數沽出，「一股不留」，更加無掂雷曼債券：「曾經有人話無買債券嘅人係發神經，我咪係囉，有個神經佬叫『楊釗』！」楊釗搵到錢，除咗每年平均捐出逾一億元做慈善外，亦厚待旗下員工，設食堂提供免費膳食，每年安排秋季旅行及團年飯。佢話，對員工好，員工先至會同你搏！

卓妮