何栢霆退居幕後

自由黨背景嘅原旅議會主席何栢霆做足六年，尋日鐵定卸任，惟廿九名理事中自由黨友唔多，結果只有胡兆英同無黨派嘅葉慶寧拗手瓜爭做主席，一直被睇高一線嘅胡兆英最終以十八票支持、八票反對、一票棄權當選新主席，即時生效，為期三年；何栢霆退居幕後，任旅議會名譽顧問。

胡兆英大比數勝出，為經濟動力贏咗漂亮一仗。佢話尋晚每隔一分鐘就收到恭賀電話，但現階段只諗點樣拆彈，團結旅議會理事，為業界服務；至於係咪參加下屆立法會選舉，就未喺佢計劃之中。承認普通話唔多好嘅佢，既抽時間惡補煲冬瓜，半年內每星期會安排練習四個鐘，又打算將生意放手交畀下屬睇多眼，睇嚟都有決心長期從政噃。