工聯會消息人士話，嫻姐去年喺九龍東排第二，一心急流勇退，原因有兩個，除咗促進工聯內部新舊輪替，的確亦因為健康問題，想退落嚟靜心休養。如果五區總辭早一年發生，相信八人大轎都抬唔郁嫻姐出戰，不過，可能個天都想玩泛民，嫻姐一年來健康指數拾級而上，加上佢有鋪辛苦癮，唔做唔舒服，工聯會評估，若然泛民真係五區總辭，嫻姐回歸，水到渠成。

工聯亦評估過，嫻姐嘅贏面高達九成。純粹數票，喺九龍東民主派嘅總票數，的確稍高親中陣營，不過，補選一般投票率較低，不利泛民，加上泛民鬼打鬼，民主黨李華明同胡志偉唔撐梁家傑，喺咁嘅形勢下，喺中產屋苑好似匯景花園同麗港城先至有優勢嘅梁家傑，個議席凍過冰水啦。

梁家傑啞子食黃連

最抵死嘅係，工聯認定梁家傑明知送死，都要焗闖鬼門關，點解？去年九龍東混戰，社民連陶君行得一萬六千票，成績唔差，如果梁家傑呢鋪唔敢玩，道德高地就會畀陶君行霸佔，二○一二年立法會選舉隨時輸畀陶君行。梁家傑唔係傻仔，依家輸畀嫻姐，非戰之罪，二○一二年仲有翻身機會；若然下屆輸畀陶君行，卻係永不超生，所以，梁家傑今次真係啞子食黃連，嫻姐就係眾望所歸，無得唔回歸！

其實，嫻姐若然重返議會，唔止為親中而戰，亦係為工聯而操勞一次。工聯喺新一屆立法會內暫時仲未能夠樹立清晰形象，如果街頭鬥士形象深入民心嘅嫻姐歸隊，對工聯嘅長遠發展有莫大好處。

所以話：「嫻姐返嚟啦！」呢句口號真係簡單又直接。