近年淡出政壇嘅前全國人大常委曾憲梓，呢兩年成功栽培愛兒曾智明（Ricky）逐步接班，Ricky除打理金利來領呔王國，又要兼顧社團及青年事務，父親都老懷安慰。臨近年尾，身為中華總商會青年委員會主席嘅Ricky，日前請一班委員返九龍塘大宅擦野生大閘蟹，歎埋曾老最拿手嘅肉骨湯，個個大快朵頤！
卓妮當晚都有去曾家大宅湊熱鬧，見到唔少名人後代，好似好世界集團張成雄兒子張俊勇（Thomas）及太太金朝陽集團執行董事陳慧苓、「金王」胡經昌姪仔胡建邦（胡漢輝集團董事）、已故政協常委黃光漢與福建中學校監黃周娟娟嘅兒子黃楚恒、燕之家董事總經理白富鴻等共卅多人，足足筵開三席至坐得晒。
巨鑊蒸夠50隻
雖然大閘蟹蒸熟就可以上枱，但安排幾十人分量就一啲都唔簡單，仲要預備其他食品，所以曾家上下要分工合作。Ricky同太太早前在九龍城「永富」預訂咗百幾隻野生大閘蟹，晚宴當日下晝攞蟹返屋企，太太負責洗蟹同蒸蟹。卓妮見屋外有個多用途巨型鑊，擺兩個大蒸籠上去蒸乜都得，每次閒閒地可以蒸五十隻大閘蟹，蒸兩次就搞掂晒；不過Ricky個明星太太好低調，點都唔肯上鏡！
茅台酒杯杯清
為招呼班兄弟，Ricky仲即日派人由梅州和增城將新鮮菜心及大頭菜心、肉丸、魷魚釀客家豆腐、傳統蒸發糕等運到香港，等大家品嘗佢家鄉嘅地道客家菜，仲有父親曾憲梓嘅拿手肉骨茶！美食當前，無杯酒飲吓唔成事，Ricky預備咗紹興花雕酒和十年金裝茅台款客，飲茅台習慣杯杯清，大家你一杯我一杯好豪氣，Ricky做主人家，當然係飲得最多啦，最後仲安排咗壓軸嘅抽獎節目，總之盡顯佢口中所講嘅客家男人特色，就係「大力、細食、勤力」！
卓妮