可惜！可恨！香港幾乎又可以贏到另一個世界冠軍o架喇，揼心揼肺，唔抵唔抵！

乜嘢世界冠軍呢？即係咁，挪威一個科學家團隊比較七十三個經濟體系嘅溫室氣體排放量，發現香港平均每人每年嘅「碳足迹」高達二十九噸，位居世界第二位，排名甚至高過二十八點六噸嘅美國，僅次於三十三噸嘅世界冠軍盧森堡。

所謂碳足迹，講嘅係消費行為造成碳排放，由於香港人熱愛消費，加上進口產品充斥市場，即係物流運輸十分頻繁，所以碳足迹就非常明顯嘞。你知啦，美國係全球消費大國，香港居然有本事「超英趕美」，你都咪話唔巴閉。

之不過咁，碳排放等於不環保，喺地球暖化問題愈來愈嚴重嘅今時今日，馬爾代夫會唔會因為香港人瘋狂消費而陸沉㗎？諗諗下都幾恐怖，你去買一個名牌手袋，搞到人哋一個國家滅亡。所以話啫，環保呢家嘢真係好重要，尤其對於未去過馬爾代夫嘅遊客嚟講，更加要積極少少保護呢個瀕臨末日嘅世外桃源。

講到呢度，又係時候通緝「氣候逃犯」歸案嘞。邊個係氣候逃犯？之唔係曾蔭權囉。丹麥首都哥本哈根即將舉行氣候大會，商討全球減排大計，各國元首濟濟一堂，哈，煲呔曾作為特區之首，居然缺席喎。環保組織綠色和平講得冇錯，既然國務院總理溫家寶都出席會議，曾蔭權冇理由唔蒲頭。綠色和平非常抵死，佢哋發起一人一蚊籌款活動，只要氣候逃犯肯去丹麥「自首」，佢哋願意夾錢送上來回機票。

唔肯去丹麥參與氣候大會已經不知所謂，另一個環保組織地球之友做過調查，顯示曾蔭權對於環保完全失職。調查顯示，四成三受訪者認為香港空氣質素過去五年冇改善，百分之八點八甚至認為從來未有改善過。三成九受訪者認為曾蔭權冇認真對付空氣污染。以十分為滿分，煲呔曾喺處理空氣污染嘅評價，只得四點一四分，即係肥佬不合格。

地球之友要求受訪者講出曾蔭權推出過嘅空氣對策，四成七話「唔覺有」，三成一表示「好似有，但說不出」。地球之友高級環境事務主任蔡家民就話嘞，調查反映曾蔭權空談環保，對付空氣污染嘅表現，比前特首董建華更差！

講出嚟可能會笑死地球村街坊，特區政府固然係環保失職，不過港產官僚特別厚顏，煲呔曾話喎，香港要發展六大優勢產業，其中之一係環保。吖，唔知馬爾代夫國民識唔識中文嘅呢？如果佢哋識中文，聽到一個氣候逃犯話要打造環保產業，唔知又會唔會爆血管激死嘅呢？萬一地球暖化水位上漲，國破家亡嘅馬爾代夫又會唔會要求曾蔭權割地賠款送個荒島畀佢哋安置難民嘅呢？

點都好啦，空談環保玩殘香港都算嘞，唔好出口術玩殘地球吖嘛！