港府檢討空氣質素指標的公眾諮詢前天已結束，有環保機構的調查稱，八成市民根本不知道政府為改善空氣污染政策做了甚麼；老朽都算叻，知道政府成日叫人「停車熄匙」，如果唔係，你享受人哋難受！不過，香港夏天特別熱及特別長，「停車熄匙」係廢噏！仲有就係「膠袋稅」，對於老朽而言，即係每次購物畀多一元或五角，對環保恐怕無補於事，對庫房則略有貢獻。
其實，都唔使調查，大家有目共睹，煲呔曾政府在改善空氣方面，無論整體或路邊空氣質素都無寸進。環保組織發言人形容得妙，話政府在改善空氣污染政策上，一時講吓藍，一時講吓綠，結果個天仍然係灰色嘅！所以煲呔曾張成績表，出嚟就係紅色！
給大家回顧一則軼事：一九九○年亞運會前，亞運會組委常務副主席兼工程總指揮長、北京市主管城建的副市長張百發在一次會上說：「如果亞運會工程不能如期完工，我就從北京最高的京廣中心頂樓跳下去！」張百發「跳樓市長」的稱呼不脛而走。這與前中國總理朱鎔基反貪腐許下的豪言壯語「有得揮」：我預備了一百副棺材，九十九副是給貪官的，第一百副留給自己！
做領導人或高官，有勇氣肯承擔，並給百姓保證，哪有東西不成功的？如果做人「大佬」，五時花六時變，未行第一步已後悔一生，那就請早抖唔好出來獻世丟人現眼！
政府搞環保及改善空氣，又係得個「吹」字，如今又話：收到嘅意見書中，有部分建議按污者自付原則，要污染者對環境問題付出代價，那老朽放個屁罰幾多啊？