首次「博鰲青年論壇」呢個月七日喺會展揭幕，成功爭辦論壇嘅香港菁英會高層尋日開記招，預告星級講者名單。論壇成功誕生，籌委會主席霍啟剛承認歷盡考驗，一度驚經濟差搵唔到贊助；菁英會主席兼論壇籌委會顧問施榮忻就話，當初發信邀請名人出席時曾畀人「睇小」，質疑論壇講者名單「冇咁堅」，幸好呢班富豪二代用實力證明，後生仔一樣有能力搞博鰲級數論壇。
呢次論壇以「金融危機下的中國外交、經濟與文化」為題，請嚟十六位講者包括國家前外交部長李肇星、博鰲亞洲論壇秘書長龍永圖及交通銀行董事長胡懷邦等分享高見。新世界發展執行董事鄭志剛（Adrian）亦係論壇籌委會主席之一，尋日因事未有現身，不過Adrian拍心口借出會展場地搞論壇。