繼早前丹麥王子祖謙閃電來港支持家鄉嘅珠寶展後，瑞典嘅貝爾吉塔公主（H.R.H. Princess Birgitta）都嚟香港趁熱鬧，尋日仲為瑞典國寶之一嘅宜家傢俬其中一間分店主持開幕禮，力撐瑞典本土貨。不過唔知公主係咪第一次主持中國式嘅開幕禮，佢全程露出詫異嘅眼神，似乎畀啲非常生猛又擒高擒低嘅舞獅嚇親。
大會安排瑞典傳統嘅鋸木儀式同代表香港嘅舞獅表演作為開幕禮嘅重頭戲，起初公主見到啲舞獅都表現得好好奇，幫完佢哋點睛後仲係咁拍打獅子個頭，但當啲舞獅開始上杆準備「採青」時，公主一路睇就一路皺住眉頭。當舞獅完成「採青」，將口中嘅生菜吐出嚟嗰陣，公主仲好似唔太受落添。
完成開幕禮後，貝爾吉塔公主巡視店舖。對住啲日見夜見嘅傢俬同日用品，公主似乎唔太感興趣，走馬看花咁好快就睇完，反而佢就好鍾意現場小丑送畀佢嘅扭扭狗氣球，臨走時仲拎咗兩個放入手袋帶返屋企！