史上最貴嘅廣深港高速鐵路今日將喺爭議聲中上立法會工務小組委員會闖第一關，對呢個燙手話題，經濟動力都玩埋一份，不過，作為核心嘅「3L」無出面，而係由政壇新面孔、香港旅行社協會主席胡兆英掛帥。巧合嘅係，旅遊業議會聽日選主席，胡兆英同無黨派嘅葉慶寧拗手瓜，胡揀喺選舉大戰前夕為業界發聲，力撐高鐵計劃，擺明想曲線拉票。旅議會一向係自由黨天下，經濟動力想攻城掠地，好明顯想為出戰立法會旅遊界鋪路。
記者會喺經濟動力總壇舉行，本來約五點半，胡六點鐘匆匆趕到，仲係單刀上陣，「3L」林健鋒、梁君彥同梁劉柔芬全部隱形。胡兆英一個人唱獨腳戲，表現尚算淡定，但內容就無乜驚喜，都係強調高鐵可帶動跨境人流，對旅業同整體經濟有利咁話；至於有乜具體行動撐高鐵，佢就話暫時未有，似乎想突出自己係旅業代表身份，多過真係要同菜園村居民對決。
做好準備冧業界
記者會開咗十五分鐘，記者問胡，開記者會係咪為聽日嘅旅議會選主席拉票，佢笑笑口話無關係，亦唔回應有冇興趣選立法會，只係話目前最緊要做好業界嘅事，佢呢句最老實，冧唔掂班業界選民，兩年後又點選立法會呢？
旅議會現任主席何柏霆同總幹事董耀中都係自由黨員，聽日換屆選舉，本身從事接待內地入境團生意嘅胡兆英選情被看高一線，若然勝出，旅議會從此改朝換代，自由黨時代結束，代之而起由經濟動力主導。據聞，經濟動力更有意挖埋董耀中過檔，全盤接收自由黨地盤。
進入立會存變數
不過，有旅遊業人士分析，胡兆英做咗旅議會主席，唔代表就能夠贏到立法會議席，事關旅議會近年制訂種種規條規管業界，得失唔少行內人，上年立法會選舉中，「法律超人」謝偉俊就係憑攻擊旅議會而得唔少分數，而且，經濟動力同自由黨互鬥分薄票源，對謝偉俊更加有利。