本文重點
樣貌與身材同樣好有福氣嘅玄學家麥玲玲，近年愈做愈掂，名利雙收，由於經常公開亮相，麥師傅衣着好講究。卓妮星期日在沙田馬場撞到佢與工程師丈夫何德，先發現麥師傅原來係Giorgio Armani（Armani）和Louis Vuitton（LV）嘅擁躉。
麥師傅着住件粉紅色底襯白花紋Armani套裝、攞住過萬元嘅LV Suhali山羊皮灰杏色中號手袋好搶眼，好多馬迷Fans爭住同佢合照。麥師傅話Armani啲衫好靚，着得舒服又稱身；而LV手袋又靚又實用，佢屋企仲有個大號Suhali手袋，貪佢放得落A4文件。
每逢換季，麥師傅例必購置新衣裳，一次買幾套，每套萬多元，通常幫襯中環IFC一間大型連鎖百貨公司，售貨員服務周到，每次有新款出，都會向佢推介，甚至帶上門畀佢試身和度身，試啱就根據佢嘅身形略為修改，改闊上圍再收窄腰身就搞掂。
代言纖體公司 酬金捐慈善
麥師傅早前擔任纖體公司代言人，成功勁減十五、六磅，佢打算將五十萬元代言人酬金全數捐畀東華三院。或許係種善恩得善果，麥師傅最近獲馬會邀請，為農曆新年十二生肖六合彩投注機睇風水擺位，仲拍埋宣傳短片，總之財源滾滾來。