本文重點
好多人都對老店情有獨鍾，畢竟時間係汰弱留強嘅最佳武器，已經有八十年歷史嘅「Jimmy's Kitchen」，淨係食佢嘅年份歷史都足以其門如巿，更何況佢確有令人無法忘懷嘅味道，難怪出名識飲識食嘅馬會大董李國棟醫生都迷上，最愛「廚房」嘅乾咖喱蝦飯。
教路歎乾咖喱蝦飯
呢碟盛惠一百八十八元嘅乾咖喱蝦飯，用新西蘭大蝦入饌，蝦肉本身已鮮味無窮，大廚會將大蝦撈咖喱粉炒香，不過李國棟醫生就提議卓妮去食嘅時候，一定要柯打跟汁，仲要講明將咖喱汁另上，咁就可以歎到兩隻口感唔同嘅咖喱。
Jimmy's Kitchen係由一位名為Jimmy嘅退役美國海軍所創立，1928年佢將呢間原本喺上海開設嘅餐廳搬咗嚟香港，初時喺灣仔開業，後來搬到中環，咖喱之外，佢哋嘅肉眼扒亦好出名。除咗位於雲咸街嘅中環老店之外，依家連尖沙咀都有分店。