做人幾時都係求生莫求死，但最近居然有人喺facebook開集體自殺群組，啱啱遠行返港嘅「生命熱線」名譽贊助人兼主席郭炳湘夫人李天穎（Wendy），聽到後嚇咗一跳，好在「生命熱線」有個「24小時預防自殺熱線服務」，隨時為有需要人士提供電話服務。由九五年「生命熱線」成立以來對個會支持有加嘅Wendy，雖然無親自接過求助電話，但就為個會出錢出力又出心。好似今日起一連兩日，佢就會同好朋友印度著名時裝設計師Bina Modi喺四季酒店為「生命熱線」舉行義賣，今年已經係兩人第八年合作。
偕設計師好友義賣行善
Bina嘅作品，件件都有人手製作嘅獨一無二刺繡，不過佢無喺香港開舖，每年只會抽幾日攞貨嚟香港饗fans，所以深得「識貨」嘅靚太們鍾愛，除咗Wendy之外，最美麗嘅港姐朱玲玲亦係捧場客。Bina由2000年開始，都將賣衫部分收益捐畀「生命熱線」，除咗去年因為經濟唔好停辦之外，年年都有唔錯成績。尋日Bina喺酒店為義賣作最後準備，剛剛喺外地返嚟嘅Wendy特登上嚟探Bina班，雖然郭太啱啱坐完長途機，但笑容依然甜美，證明做善事真係會令人容光煥發！
黑襯漸變紅 夠sharp又得體
尋日Wendy着嘅都係Bina出品，呢件以黑色作主色嘅one-piece，配以漸變嘅紅色，繡上花卉圖案，本身都好sharp，配埋條簡單嘅legging，輕便得嚟又好得體。Bina同卓妮話，Wendy平均每年都會幫Bina買廿件作品，件件都有唔同圖案設計，咁咪諗到頭到爆？熱愛工作嘅Bina話，生活上樣樣都係佢靈感來源，只要細心留意身邊事物，就會得心應手，手到拿來，設計意念一啲都唔貧乏。
卓妮