究竟煲呔曾最近做咗啲乜嘢好人好事呢？答案就係乜都冇做過！佢甚至有意無意咁減少喺公開場合發言同曝光，希望市民可以「眼不見為乾淨」，見佢少啲憎佢少啲。基於少做少錯、唔做唔錯嘅原則，佢嘅民望即使無力反彈，都可以避免再度插水喇。

唔知係咪因為呢個原因，煲呔曾呢個禮拜連每周二定期召開嘅行政會議，都決定暫停一周唔開會住，以免一時錯手又通過咗啲倒行逆施嘅政策同法案，激起民憤。行會開少次會嘅另一個好處，係減少各自為政、一盤散沙嘅非官守行會成員再次唔對嘴講錯嘢，諗落真係除笨有精。

龜縮隱形 香港受害

不過，煲呔曾採取呢種龜縮隱形嘅消極政策，同一眾行會集體偷懶蛇王，最終受害嘅都係香港市民。其一係即使行會冇會開，成班行會成員嘅人工亦照樣袋袋平安，停一個禮拜會，都唔知白白浪費幾多公帑。其二係香港社會存在幾十萬樣問題有待政府解決，行會作為政府嘅最高決策機關，唔開會就乜嘢政策法案都通過唔到，要全港七百萬市民同佢哋一齊蹉跎歲月。

例如政府原定喺今個立法年度，向立法會提交廿二條法案，條條都有待行會正式拍板，但截至聽日召開嘅立法會大會，政府至今只係交咗三條咁大把。

十九法案 拖得就拖

如果行會再係咁開吓停吓，其餘十九條一係就積到立法年度尾一次過匆匆上會，一係就被迫押後到下個立法年度先提交，當中嘅競爭法、食物安全大法同中央屠宰立法等，更加係前後拖咗幾年都未上會。希望審計署除咗針對啲公營機構同執行部門嘅大花筒行為外，亦應該打吓特首辦同行會呢兩隻「大老虎」，查吓佢哋嘅行政效率同有冇浪費公帑！