若然閣下係駕駛人士，又經常遇到泊車難題，家陣等功夫茶醒你少少貼士。呢嗱，如果你出入中環，建議你泊喺大會堂多層停車場；如果你行走葵芳，建議你泊喺葵芳多層停車場；如果你進出荃灣，建議你泊喺荃灣綜合大樓停車場。呢三個隸屬於政府嘅停車場絕對係百分百安全保證，一定唔驚冇位泊，因為全場拍烏蠅！

根據資料顯示，大會堂多層停車場嘅使用率係低到無倫嘅百分之七，葵芳多層停車場係百分之十，荃灣綜合大樓停車場係百分之十三。

至於其他運輸署轄下嘅政府停車場咯喎，情況其實都唔係好得幾多，使用率大概都係百分之十幾至四十左右。

功夫茶之所以建議駕駛人士多用政府停車場，首先當然係方便自己容易搵位啦。其次就係，喂，任由車位空置，等於浪費公帑，駕駛人士多啲幫襯，政府收入好番少少，冇咁肉酸吖嘛。之不過咁，凡事有利自必有弊，你去幫襯政府停車場無疑係唔使擔心冇位泊，可惜位置通常比較偏僻，泊完車可能有必要搭的士去你嘅目的地。就好似荃灣綜合大樓停車場咁吖，距離荃灣港鐵站遠到阿媽都唔認得，東南西北去邊都唔就腳。

講咗咁耐，功夫茶到底想講乜？即係咁，運輸署原來係一個不善經營嘅敗家仔，任由停車場「十位九空」，部分甚至淪為露宿者天堂，居然唔諗辦法廣招客源。係，位置的確係唔就腳，咁可唔可以減價呀？可唔可以推出長租計劃呀？舉個例，如果政府肯以每個月一千蚊租出車位，相信好多車主寧願行多兩步路都會幫襯。半賣半送益街坊，點都好過眼白白浪費寶貴資源吖。

弊就弊在，運輸署不思進取，政府停車場同私營停車場收費相差無幾，喺咁嘅情況之下，阿茂都唔睬你啦！

好嘞，反正拍烏蠅，維修又重皮，長期虧蝕嘅政府停車場可唔可以清拆重建呢？理論上係可以嘅，實際上荃灣綜合大樓停車場同埋油麻地停車場已經決定拆卸。問題係，清拆時間表仍然有待研究，唔知等到何年何月先至能夠廢物利用。

大家可能會認為，拍烏蠅咪由得佢拍烏蠅囉，即使淪為露宿者天堂都唔係大問題啫，當做善事為有需要人士提供安樂窩囉。呢嗱，說話就唔可以咁講嘞，大家明唔明白露宿者天堂好多時候等同於犯罪者天堂？又或者等同於吸毒者天堂？家陣香港毒品氾濫，連學校都話要驗毒，如果連停車場都沉淪毒海，你叫抗毒先鋒曾蔭權點向市民交代！

點都好啦，唔該運輸署唔好再敗家，諗諗辦法吸引租客，唔好做一個全港最失敗嘅收租佬！